/ aktuelt / Ukrainas president Volodymyr Zelenskyj i Oslo: "Eg håpar at Noreg vil bidra til å få på plass tryggingsgarantiar"

Ukrainas president Volodymyr Zelenskyj takkar Noreg for støtta til forsvar, energisektoren og teknologi i talen sin under besøket i Oslo.

– Takk for det de gjer, kjære Jonas, sa Zelenskyj i ein felles pressekonferanse med Noregs statsminister Jonas Gahr Støre (Ap).

– De skjøna omgåande konsekvensen av krigen. De stod på sida til rettferd og sunn fornuft. Vi takkar dykk for ein veldig, veldig stor støtte, sa Zelenskyj.

I talen sin rosa Støre Zelenskyj og sa at Noreg støttar Ukraina i kampen mot Russland.

– Vi deler målet ditt om eit fritt Ukraina, og eg veit at ingen vil ha fred meir enn deg og det ukrainske folket, som blir ramma av angrep. Kampen din har vår fulle støtte, sa Støre.

– Hjelpte oss gjennom vinteren

Den ukrainske presidenten takka særleg for støtta til energisektoren.

– Det hjelpte oss gjennom vinteren, sa han.

Han sa vidare at han håpar at Noreg vil spele ei stor rolle i støtta også framover.

– Alle partnarane våre må jobbe saman, og eg håpar at Noreg vil bidra til å få på plass tryggingsgarantiar

Han sa også at det er viktig å halde oppe presset mot Russland og stanse Putins manipulasjon.

Zelenskyj peika på at diplomati er einaste måten å stanse krigen på. Stans av luftangrep, av angrep mot energiinfrastruktur og til havs er svært viktige steg, sa han.

– Til slutt må vi ende opp med ei våpenkvile overalt, sa den ukrainske presidenten.

– Viktig at Ukraina får ta del i fredsforhandlingar

Støre understreka i talen sin at det er viktig at Ukraina får ta del i fredsforhandlingar, og seier også at Europa er viktig i samtalane om Ukrainas framtid.

Noreg varsla nyleg ein støttepakke på 3,5 milliardar euro til Ukraina i 2025, ein stor auke frå tidlegare. Støre seier at delar av midlane skal gå til artilleri, dronar og investering i ukrainsk næringsliv.

– Du er blant vennar

Zelenskyj er torsdag på besøk i Noreg. Den ukrainske presidenten landa på den militære flyplassen på Gardermoen rundt klokka 10.30 torsdag formiddag.

I Oslo blei han møtt av statsminister Jonas Gahr Støre (Ap) og andre regjeringsmedlemmar.

– Noreg er på Ukrainas side i denne veldig dramatiske situasjonen. Du er blant vennar, sa Støre etter å ha tatt imot den ukrainske presidenten i statsministerbustaden i Oslo.

Zelenskyj takka Noreg for støtta, før dei to starta samtalar.

Samtalar med fleire frå regjeringa

– Eg vil diskutere dagens situasjon ved frontlinja, i diplomatiet, med USA og om tryggingsgarantiar, sa Zelenskyj.

Den ukrainske presidenten kom til statsministerbustaden i 13-tida. Der hadde han samtalar med Støre, finansminister Jens Stoltenberg (Ap), utanriksminister Espen Barth Eide (Ap) og forsvarsminister Tore O. Sandvik (Ap).

Møtte kronprinsparet

Zelenskyj møtte kronprinsregenten og kronprinsesse Mette-Marit på Slottet torsdag ettermiddag, etter møtet med Støre & co.

Det var eit av dei mange punkta på Zelenskyjs program i Oslo torsdag var besøk på Slottet.

Kronprins Haakon er regent sidan kong Harald er på ferie i utlandet. Kronprinsesse Mette-Marit var òg til stades.

Etter slottsvisittten, drog Zelenskyj-følget til Stortinget.

(©NPK)