/ natur / Fugleinfluensa hos fjellrev i Noreg for første gong

Dei fire kvalpane oppheldt seg i eit område nær den russiske busetjinga Barentsburg på Svalbard, opplyser Sysselmeisteren på Svalbard.

Dei sjuke fjellrevane vart melde inn i slutten av juli. Det vart mistenkt rabies. Dei siste månadene er det nemleg påvist ei rekke tilfelle av rabies hos fjellrev på Svalbard, og symptoma er liknande.

Men då prøvene vart analyserte, vart det påvist fugleinfluensa.

– Det påviste viruset er av subtypen H5N5, ein subtype som sirkulerer i nordområda og har forårsaka sjukdomstilfelle hos både ville fuglar og pattedyr i Norden, Island og Storbritannia dei siste åra.

Heile kullet vart avliva, i tillegg til tre andre fjellrevar i nærleiken av hiet.

– Det vart først observert tre sjuke kvalpar, og to av desse vart avliva av dyrevelferdsomsyn. På grunn av nærleiken til Barentsburg og auka rabiesvaktsemd vart resten av kullet avliva. Av dei tre kvalpane som er att var det éin sjuk. I tillegg vart tre vaksne fjellrevar nær hiet avliva, opplyser Sysselmeisteren.

Fjellrev kan smittast av fugleinfluensa gjennom direkte kontakt med sjuke eller døde dyr. Vidare kan dyra smitte menneske.

– Både høgpatogen fugleinfluensa og rabies er alvorlege sjukdommar som kan smitte menneske, og det er derfor viktig at ein unngår kontakt med sjuke dyr, opplyser Sysselmeisteren. (©NPK)