Med få ord 08 2025

Trugar med å skyte trua gås

Sverige har betalt millionar for å berge den trua dverggåsa si. Men dreg ei gås over landegrensa, risikerer ho å bli skoten av norske styresmakter. Miljødirektoratet har nemleg omtalt den svenske, trua dverggåsa som ein mogleg trussel mot den norske dverggåsa, skriv SVT. Norsk dverggås er også trua. Norske styresmakter fryktar at den svenske fuglen menger seg med den norske, noko som kan forandre trekkruta til dverggjæsene og føre til at dei venner seg til hekkestadene til dei svenske gjæsene, ifølgje SVT.

Istida hadde rikt dyreliv

34 år etter funnet av minst 70.000 år gamle beinrestar frå isbjørn i Narvik, kan forskarar stadfeste eit rikt dyreliv i det arktiske Europa under istida. Det opplyser Universitetet i Bergen i ei pressemelding. 8. august 1991 fann forskarar beinrestane, som var minst 70.000 år gamle, i Arne Qvam-grotta i Kjøpsvik i Narvik. Det vart starten på eit forskingsprosjekt som har strekt seg over 30 år. Studien klassifiserer 46 grupper av pattedyr, fuglar og fisk. Fleire av artane er aldri tidlegare funne på Nordkalotten.

Hamnespy fester seg i vest

Utbreiinga av hamnespy i Noreg ser ut til å gå langsamare enn i begynninga, men samtidig festar det grepet i dei områda den er observert. Hamnespy, også kjent som japansk sjøpung, er ein framand art som utgjer ein trugsel mot det marine miljøet i Noreg. Den spreier seg raskt og kan danne store matter på havbotnen, noko som kan fortrengje andre artar. Den spreier seg hovudsakleg gjennom å feste seg til skip og båtar, og deretter ved at bitar av koloniar fell av og feste seg på nye stader. Sjøpungen har deretter spreidd seg og er no registrert på fleire stader langs kysten, spesielt på Vestlandet.

Hurtigladarar over alt

No er det vanskelegare å finne ein kommune utan hurtigladar enn med. Under fire prosent av kommunane har ikkje hurtigladar. Det fortel Norsk elbilforening i ei pressemelding. – Det er fantastisk å tenkje på at vi har gått frå 300 til 14 kommunar utan hurtigladar på under ti år. Det viser kor raskt ein kan byggje infrastruktur når både myndigheiter og næringsliv legg til rette for det, seier generalsekretær i Norsk elbilforening, Christina Bu.