/ fred / "Ho er eit ekstraordinært døme på sivilt mot i Latin-Amerika i nyare tid"

Venezuelas opposisjonsleiar María Corina Machado blir tildelt Nobels fredspris.

– Ho får Nobels fredspris for arbeidet sitt med å fremje demokratiske rettar for folket i Venezuela og for kampen for å oppnå ein rettferdig og fredeleg overgang frå diktatur til demokrati, seier leiar Jørgen Watne Frydnes i Nobelkomiteen.

Han kallar henne samlande figur i ein politisk opposisjon som ein gong var djupt splitta.

Leiar Jørgen Watne Frydnes i Nobelkomiteen seier demokratiet avheng av folk som Maria Corina Machado. Foto: Jo Straube, Nobel Outreach

– Ho er eit ekstraordinært døme på sivilt mot i Latin-Amerika i nyare tid, seier han.

Ho er leiar for partiet Vente Venezuela, som beskriv seg som sentrumsliberale. Ho var medlem av Venezuelas parlament frå 2011 til 2014 og grunnla valobservasjonsorganisasjonen Súmate.

Venezuela har utvikla seg frå eit relativt demokratisk og blomstrande land til ein brutal og autoritær stat som no lid humanitært og er i økonomisk krise, seier Frydnes.

– Demokratiet avheng av folk som nektar å teie og som tør å stå fram trass i alvorleg risiko.

– Det siste året har ho vorte tvinga til å leve i skjul, men har likevel vorte verande i Venezuela, noko som har inspirert millionar av menneske, seier Frydnes.

(©NPK)